Жанубий Кореяда умрбодга қамалган ўзбекистонлик озод қилинди: суд ишни қайта кўриб чиқади
Суд 2009 йилдаги такси ҳайдовчиси қотиллиги бўйича терговда қонунбузарликлар аниқлангани сабабли ишни қайта кўриб чиқишга қарор қилди.
Жанубий Кореяда такси ҳайдовчисини ўлдиришда айбланиб, умрбод қамоқ жазосига ҳукм қилинган Ўзбекистон фуқароси Бозоров Акмал 16 йилдан ортиқ вақт ўтиб, озодликка чиқарилди. Уни қамоқхона ташқарисида отаси кутиб олди.
Чангвон округ суди ишни қайта кўриб чиқиш тўғрисида қарор қабул қилиб, суд жараёни якунига қадар унга тайинланган жазони ижро этишни тўхтатди.
37 ёшли Акмал 2009 йил март ойида Чангвон шаҳрида такси ҳайдовчисининг ўлдирилишида айбланган. У дастлабки терговда айбига иқрор бўлган, бироқ кейинчалик бу кўрсатмалар полиция зўравонлиги ва ноқонуний тергов усуллари орқали олинганини билдирган. У бошқа бир таксини талон-торож қилишда иштирок этганини тан олган, аммо ҳайдовчининг қотиллигига алоқадорлигини рад этган.
Шунга қарамай, Акмал қотиллик иши бўйича судланган. 2010 йил апрелида Жанубий Корея Олий суди унга тайинланган умрбод қамоқ жазосини ўз кучида қолдирган.
Ишни қайта кўриб чиқиш ҳақидаги дастлабки аризаси 2015 йилда рад этилган. 2025 йил 2 январда эса унинг адвокати Пак Жун Ён судга янги ариза билан мурожаат қилган.
Суд тергов жараёнида жиддий қонунбузарликларга йўл қўйилганини аниқлади. Жумладан, полиция Акмалга унинг ДНКси жиноят жойидан топилганини айтиб алдаган, вафот этган жабрланувчини тирик деб кўрсатиб, ундан иқрорлик олишга уринган. Шунингдек, корейс тилини яхши билмаган Акмалга таржимон тақдим этилмаган.
Ҳимоя томони янги далилларни, жумладан, қотиллик қуроли сотилган дўкон ҳақидаги қалбакилаштирилгани айтилаётган полиция ҳисоботини тақдим этган. Адвокат, шунингдек, такси ҳисоблагичида қайд этилган масофа билан полиция аниқлаган йўналиш ўртасида олти километр фарқ борлигини таъкидлаган.
Суд ноқонуний тергов ишни қайта кўриб чиқиш учун асос етарли эканини билдирди. Янги далиллар эса қайта суд жараёнида баҳоланади.
Акмал ўзининг ноҳақ қамалганини ҳис қилиб, кўп азоб чекканини айтган. Шу билан бирга, у жабрланувчининг оиласига етган эҳтимолий азоб учун афсус билдирган ва суд жараёнида ҳақиқатни айтишга ваъда берган.
Ҳозирча иш бўйича якуний қарор чиқарилмаган.
