Ўйинчоқ ичидан гашиш чиқди: аёл ушланди
Гиёҳванд модда Тошкентга олиб кетилаётган бўлган.
Тошкент вилояти ИИББ ходимлари Тошкент шаҳрига гиёҳванд модда олиб кетаётган аёлни қўлга олди. У моддаларни чақалоқ кўринишидаги болалар ўйинчоғи ичига яширган.
Маълум қилинишича, Тошкент вилояти ИИББ Кибержиноятларга қарши курашиш бошқармаси ҳамда Нурафшон шаҳар ИИБ тезкор ходимлари ҳамкорлигида ўтказилган тадбир давомида Бектемир туманида ҳаракатланаётган “Nexia 3” автомобили тўхтатиб текширилган.
Текширувда 1970 йилда туғилган Г.А. исмли аёлнинг буюмлари орасидан ичига гиёҳванд модда яширилган ўйинчоқ топилган. Унинг ичидан ҳар бири 100–150 граммдан қадоқланган, жами саккиз дона гашиш моддаси аниқланган.
Суриштирувларга кўра, аёл гиёҳванд моддаларни Фарғона вилоятидан сотиб олиб, Тошкент шаҳрида сотиш мақсадида олиб келаётган бўлган.
Автомобиль ҳайдовчиси эса “Yandex” тизими орқали такси хизматини кўрсатишини ва аёлни биринчи марта кўраётганини билдирган.
Ҳолат юзасидан жиноят иши қўзғатилган. Ҳозирда гиёҳванд моддалар манбасини аниқлаш бўйича тезкор-суриштирув ишлари давом этмоқда.
Эслатиб ўтамиз, гиёҳвандлик воситаларининг ноқонуний муомаласи учун қонунчиликда 20 йилгача озодликдан маҳрум қилиш жазоси белгиланган.
