Тошкентда қизамиқ хавфи ортдими? Расмий муносабат билдирилди
Ижтимоий тармоқларда қизамиққа гумон қилинган 290 та ҳолат ва беморлар билан алоқада бўлган 10 мингдан ортиқ шахс рўйхатга олингани ҳақида хабарлар тарқалди.
Санитария-эпидемиологик осойишталик ва жамоат саломатлиги қўмитасининг Тошкент шаҳар бошқармаси пойтахтда қизамиқ кескин тарқалаётгани ҳақидаги хабарларга муносабат билдирди.
Ижтимоий тармоқларда Тошкент шаҳрида қизамиқ билан касалланишга гумон қилинган 290 та ҳолат аниқлангани ва беморлар билан алоқада бўлган 10 мингдан ортиқ шахс рўйхатга олингани ҳақида хабарлар тарқалган эди.
Қўмита маълумотига кўра, ҳозирда Тошкент шаҳри ва мамлакатнинг бошқа ҳудудларида қизамиқ бўйича эпидемиологик вазият барқарор. Тарқалган рақамлар 2026 йилнинг дастлабки тўққиз ойидаги жамланма кўрсаткичларни акс эттиради. Шу сабабли уларни қисқа вақт ичида юз берган касалланиш ҳолатлари ёки айни пайтдаги вазият сифатида талқин қилиш нотўғри.
Шунингдек, 2026 йилнинг шу даврида қизамиқ билан касалланиш кўрсаткичи 2025 йилга нисбатан 40 фоизга камайган.
Қўмита фуқароларни ижтимоий тармоқлардаги маълумотларни тўғри талқин қилишга ва тасдиқланмаган хабарларни тарқатмасликка чақирди.
Маълумот учун, 2026 йилнинг дастлабки тўққиз ойида Тошкент шаҳрида режали эмлаш доирасида 47 494 нафар бир ёшли ва 42 767 нафар олти ёшли бола қизамиқ, эпидемик паротит ва қизилчага қарши КПК вакцинаси билан эмланган.
