Фармацевтлар учун ҳам байрам: Ўзбекистонда касб байрами номи ўзгариши мумкин
Тиббиёт ходимлари кунини Тиббиёт ва фармацевтика ходимлари куни деб ўзгартириш таклиф қилинди.
Ўзбекистонда ноябрь ойининг иккинчи якшанбасини Тиббиёт ва фармацевтика ходимлари куни сифатида белгилаш таклиф этилмоқда. Бу ҳақдаги қонун лойиҳаси Олий Мажлис Қонунчилик палатаси мажлисида қабул қилиниб, Сенатга юборилди.
Қонун лойиҳаси билан “Ўзбекистон Республикаси Тиббиёт ходимлари кунини белгилаш тўғрисида”ги қонунга ўзгартириш киритиш назарда тутилган. Унга кўра, амалдаги қонундаги “Тиббиёт ходимлари” ибораси “Тиббиёт ва фармацевтика ходимлари” деган сўзлар билан алмаштирилади.
Шу тариқа, ҳар йили ноябрь ойининг иккинчи якшанбасида нишонланадиган касб байрами фармацевтика соҳаси мутахассисларини ҳам қамраб олиши мумкин.
Мажлисда таъкидланишича, сўнгги йилларда Ўзбекистонда фармацевтика соҳаси жадал ривожланмоқда. Айни пайтда мамлакатда 50 мингдан ортиқ фармацевтика мутахассиси фаолият юритмоқда.
Шунингдек, Ўзбекистонда 504 та фармацевтика ишлаб чиқариш корхонаси, 478 та дистрибьютор ташкилот ва 14 мингдан ортиқ дорихона мавжуд.
Қайд этилишича, таклиф этилаётган ўзгартириш тегишли қонун ҳужжатларидаги тушунчаларни ўзаро мувофиқлаштиришга ҳам хизмат қилади.
Қонун лойиҳаси қабул қилиниши фармацевтика ходимларининг жамиятдаги мавқеини ошириш, уларни моддий ва маънавий қўллаб-қувватлашга ёрдам бериши кутилмоқда.
