300 мингдан ортиқ виза бекор қилинди: Вашингтон сабабини тушунтирди
Трамп маъмурияти АҚШда иммиграция сиёсатини қатъийлаштирмоқда.
АҚШ Давлат департаменти Дональд Трампнинг иккинчи президентлик муддати бошланганидан буён хорижий фуқароларга берилган 300 мингдан ортиқ визани бекор қилди. Бу ҳақда департамент матбуот котиби Томми Пиготт маълум қилди.
Унинг таъкидлашича, Трамп маъмурияти визаларни бекор қилиш бўйича аввалги маъмуриятларга қараганда тезроқ суръатда иш олиб бормоқда.
“Биз чет элликларнинг қонунларни бузишига, фирибгарлик содир этишига ёки миллий хавфсизликка путур етказишига тоқат қилмаймиз”, — деб ёзди Пиготт Х ижтимоий тармоғидаги саҳифасида.
Шунингдек, у АҚШ чегаралари ва мамлакат хавфсизлигини таъминлаш мақсадида тегишли чоралар кўриш давом эттирилишини билдирди.
Дональд Трамп 2025 йил январь ойида АҚШнинг 47-президенти сифатида лавозимга киришганидан бери иммиграция сиёсатини қатъийлаштириш тарафдори бўлиб келмоқда. У мамлакатга ноқонуний кириш ҳолатларини бир неча бор танқид қилган.
