Президент Шавкат Мирзиёев тил байрами билан Ўзбекистон халқини табриклади

Ўзбекистон Президенти Шавкат Мирзиёев 21 октябрь — Ўзбек тили байрами куни муносабати билан ватандошларни табриклаб, давлат тилини ривожлантириш, таълим сифатини ошириш ва ўзбек тилининг замонавий технологиялардаги имкониятларини кенгайтириш бўйича муҳим вазифаларни қайд этди.

 

Давлат раҳбари она тили халқнинг тарихий хотираси, билими, тажрибаси ва маънавий қадриятларини ўзида мужассам этишини таъкидлади. Унинг сўзларига кўра, ўзбек тилининг имкониятларини янги илмий ютуқлар, технологиялар ва ижод намуналари билан бойитиш муҳим вазифалардан биридир.

 

Президент Ўзбекистонда турли миллат ва элат вакиллари ягона оила бўлиб яшашини таъкидлаб, ҳар бир инсоннинг она тили ва маданий қадриятларига ҳурмат кўрсатиш дўстлик ва ҳамжиҳатликнинг муҳим асоси эканини қайд этди. Шу боис қорақалпоқ тили ва бошқа тилларни ривожлантириш, ўзбек тилини ўрганиш учун қулай шароитлар яратиш ишлари ўзаро уйғун равишда олиб борилаётгани билдирилди.

 

Шавкат Мирзиёев таълим соҳасида ўқувчиларнинг ўқиш, тушуниш, гапириш ва саводли ёзиш кўникмаларини ривожлантиришга устувор аҳамият бериш зарурлигини таъкидлади. Дарсликлар ва ўқитиш усулларини янгилашда ўзбек тилини она тили сифатида ўрганаётган болалар билан уни давлат тили сифатида ўзлаштираётган ўқувчиларнинг эҳтиёжлари ўртасидаги фарқни ҳисобга олиш лозимлиги қайд этилди.

 

Давлат идоралари фаолиятида ҳам давлат тилига ҳурмат намоён бўлиши керак. Қонунлар, қарорлар, йўриқномалар ва фуқароларнинг мурожаатларига бериладиган жавоблар равон, аниқ ва тушунарли тилда ёзилиши зарурлиги таъкидланди.

 

Шунингдек, тиббиёт, муҳандислик, иқтисодиёт ва бошқа соҳаларда ўзбек тилидаги ишончли илмий адабиётлар, сифатли таржималар ҳамда электрон ресурслардан фойдаланиш имкониятларини кенгайтириш муҳимлиги қайд этилди. Бу борада олимлар, тилшунослар, таржимонлар ва соҳа мутахассисларининг ҳамкорлиги зарурлиги билдирилди.

 

Президент ўзбек тилининг рақамли муҳитдаги имкониятларини кенгайтириш масаласига ҳам алоҳида тўхталди. Хусусан, электрон луғатлар, таржима ва таҳрир воситалари, нутқни матнга ҳамда матнни овозга айлантирадиган технологияларни ривожлантириш муҳим вазифалар сифатида белгиланди. Бунда муаллифлик ҳуқуқи ва шахсий маълумотларни ҳимоя қилиш, шунингдек, ногиронлиги бўлган инсонлар учун ҳам қулай имкониятлар яратишга эътибор қаратиш лозимлиги таъкидланди.

 

Давлат раҳбари сунъий интеллект воситаларининг давлат тилидаги сифатини инсонларга қанчалик аниқ ва фойдали ёрдам бера олиши билан баҳолаш кераклигини қайд этди. Ёзув ва имло масалаларидаги ечимлар эса илмий асос, жамоатчилик билан мулоқот ва амалий тайёргарликка таяниши зарурлигини билдирди.

 

Шавкат Мирзиёев ўзбек тилини ривожлантириш йўлида меҳнат қилаётган олимлар, тадқиқотчилар, муаллимлар, таржимонлар, адиблар, журналистлар, ноширлар ва ахборот технологиялари мутахассисларига миннатдорлик билдирди. Шунингдек, ўзбек тилини ўрганаётган юртдошлар ва хорижликларга ташаккур айтиб, она тилининг нуфузини ошириш ҳамда унинг дунё билан мулоқотини кенгайтиришга ҳисса қўшишга чақирди.

 

Президент табрик якунида ватандошларга сиҳат-саломатлик, тинчлик, фаровонлик ва муваффақиятлар тилади.