Дўконларда савдо қоидаларига риоя этилишини назорат қилиб, бу борадаги видеолари билан танилган ва халқнинг истеъмол маданиятини шакллантиришга хизмат қилувчи “Activist” лойиҳаси тугатилди. Бу ҳақда унинг муаллифи Ҳожиакбар Носиров маълум қилди.
“Лойиҳа ўз фаолиятини бутунлай якунлади. Яқин орада интервью орқали бунинг сабабларини тўлиқроқ ёритиб бераман. Гувоҳи бўлганингиздек, жудаям кўп туҳмат ва босимларга учрашимга тўғри келди. Ҳаттоки оилам билан боғлиқ таҳдидларга ҳам қарамасдан бу йўлда давом этдим. Чунки сизларнинг қўллаб-қувватлашингиз менга катта далда берарди.
2 йиллик фаолиятимда кимнингдир кўнглига билиб-билмай озор бериб қўйган бўлсам, чин дилдан узр сўрайман”, дейди блогер.
Эслатиб ўтамиз, аввалроқ Ҳожиакбар Носиров айрим йогуртлар ҳаром эканини айтиб чиққани учун 15 суткага қамалганди. У “диний адоватни тарғиб қилувчи материаллар тарқатиш” ва “ички ишлар ходимининг қонуний талабларини бажармаслик”да айбланган.