Афғон мусиқачи аёллар мамлакатни тарк эта олмади
Афғонистон аёллар оркестри Кобулда эвакуация қилинмасдан қолиб кетган. Бу ҳақда “Wal Street Journal” хабар берди.
Нашр маълумотларига кўра, “Зуҳра оркестри” номини олган афғон аёлларидан иборат жамоага кўплаб америкалик давлат ва жамоат арбоблари ёрдам кўрсатган. Созанда аёллар ва уларнинг оила аъзолари автобусга ўтқазилган ҳамда аэропортгача олиб келинган.
Аммо Кобул халқаро аэропортида улар назорат пунктида тўхтатилган. Жамоа аэропорт ичкарисига киритилмаган. Бунга сабаб - пост бошлиғи рухсати керак бўлган. У бу пайтда ухлаётгани учун аскарлар бошлиқни уйғотишга журъат қилолмаган.
Оқибатда аёллар оркестри ва уларнинг оила аъзолари Кобулда қолиб кетган.
Маълумот ўрнида: толиблар август ойида ҳукумат кучларига қарши ҳужумларни кучайтирди. 15 август куни Кобул шаҳри жангсиз эгалланди. 31 август куни АҚШнинг сўнгги қисмлари Афғонистонни тарк этди. Шундан кейин Кобул аэропорти назорати ҳам “Толибон” қўлига ўтган.
6 сентябрь куни мамлакатда толиблар эгалламаган сўнгги вилоят––Панжшер ҳам босиб олинди. Аммо ҳозирда қаршилик кучлари билан жанглар давом этмоқда.
Эслатиб ўтамиз, бундан аввал НАТО Бош котиби Афғонистон ҳукумати қулашининг асосий сабабини маълум қилган эди.
Жаҳонгир Қўзиев
