Улар ҳатто йўлакда ҳам кўришиб қолмаслиги керак—“Politico”
АҚШ Путин ва Байденни Балида учраштирмаслик ҳаракатида
АҚШ расмийлари Россия президенти Владимир Путин ва Жо Байденнинг Индонезиядаги G20 саммитида учрашишига йўл қўймаслик учун барча имкониятларни ишга солмоқда. Бу ҳақда “Politico” газетаси ёзмоқда.
Қайд этилишича, улар Байден россиялик ҳамкасби билан йўлакда тўқнашиб кетмаслиги ва G20 саммитида етакчилар билан бирга суратга тушиш вақтида унинг йўлини кесиб ўтмаслиги учун чоралар кўрмоқда.
Президентлик даврида Байден Путин билан 2021 йилда Женева саммитида фақат бир марта учрашган. Ўз навбатида, Россия ташқи ишлар вазири Сергей Лавров саммитда икки давлат президентлари Владимир Путин ва Жо Байденнинг эҳтимолий алоқалари ҳақидаги саволга жавоб берар экан, Россия G20 саммити доирасида АҚШ билан музокараларни рад этмаслигини айтганди.
Эслатиб ўтамиз: G20 саммити 15-16 ноябрь кунлари Индонезиянинг Бали оролида бўлиб ўтади.
