Асал боғча ва шифохоналарда рационга киритилади
Республикада ғўзани асалари билан чанглатиш агротехникасидан фойдаланилади.
Асал маҳсулоти боғча тарбияланувчилари ва шифохоналардаги беморларнинг кунлик расионига киритилади. Бу ҳақда Ҳукуматнинг «Асаларичилик тармоғини қўллаб-қувватлаш ва қишлоқ хўжалиги экинларини асалари билан чанглатишга доир қўшимча чора-тадбирлар тўғрисида» ги қарори қабул қилинди.
Унга кўра, 2023 йилда 200 минг гектар майдонда пахта ҳосилдорлигини ошириш учун ғўзани асалари билан чанглатиш агротехникаси қўлланилади.
Қашқадарё, Навоий, Самарқанд, Сурхондарё ва Тошкент вилоятларида Наманган ҳамда Фарғона вилоятлари тажрибаси асосида Асаларичилик саноат марказлари ташкил этилади. Шунингдек, 2024 йилдан интенсив мевали боғларда асалари билан чанглатиш агротехникасини қўллаш чоралари кўрилади.
Бундан ташқари, 2023 йил 1 сентябрдан мактабгача таълим ташкилотлари тарбияланувчилари ва шифохоналардаги беморларнинг кунлик истеъмол расионига асал маҳсулотини киритиш масаласи кўриб чиқилади. Ҳар йили 1–10 декабрь кунлари Тошкент шаҳрида «Асал байрами» ва «Асаларичилик маҳсулотлари» халқаро кўргазмаси ўтказиб борилади.
Қарор билан, шунингдек, «Фермерлар мактаби»да пахта майдонлари ва интенсив мевали боғларда асаларилар билан чанглатиш агротехникасини қўллаш бўйича ўқув курслари ташкил этилади.
