Биологик нуқтаи назардан қачондир биз қаршилик қила олмайдиган вирус пайдо бўлади — ЖССТ
ЖССТ бош директори Тедрос Аданом Гебрейесус инсониятни янги, аммо енгиб бўлмас вирус вужудга келишидан огоҳлантирди.
"Биологик нуқтаи назардан қачондир биз қаршилик қила олмайдиган вирус пайдо бўлади",— деган у "катта йигирмалик" давлатларининг молия ва соғлиқни сақлаш вазирлари учрашувида.
Гебрейесус кейинги пандемияларга тайёргарлик кўриш учун ҳозирги пандемиядан керакли хулосалар чиқариш зарурлигини қайд этди. Унинг фикрича, дунёга кучайтирилган ЖССТ ва янги молиялаштириш механизми керак. Шунингдек, пандемияларга қарши кураш тўғрисида келишув имзоланиши зарурлиги таъкидланди.
Гебрейесус бундан аввал пандемияни енгиш учун инсоният қўлида барча воситалар борлигини маълум қилганди. Унинг сўзларига кўра, йил охирига қадар ер шари аҳолисининг 40 фоизини эмлашга эришиш мушкул вазифа эмас. Аммо бунинг учун давлатлар ва компаниялар ўз баёнотларига тўла амал қилган ҳолда ҳаракат қилишлари керак.
Бундан аввал коронавируснинг хотирага таъсири тўғрисида маълумот берилганди.
Жаҳонгир Қўзиев
