Бирлашган Араб Амирликларида Ҳорун ар-Рашиднинг рафиқаси Зубайдага тегишли хазиналар топилди
Шаржа амирлиги археология идорасининг археологик миссияси давомида Аббосийлар сулоласи даврига оид кумуш тангалар хазинасини топди.
Бу ҳақда "Islam.ru хабар берди.
Маълум қилинишича, тангалар эски сополдан ясалган идишда бўлган. Мутахассислар аниқланган тангалар орасида Зубайда Уммул Воҳидга (милодий 762 / 765-831) тегишли кумуш дирҳам бўлганини айтган. У Аббосийлар сулоласидан чиққан араб маликаси, энг қудратли халифалардан бири Ҳорун ар-Рашиднинг суюкли рафиқаси бўлиб, ўғли халифа Муҳаммад Ал Амин даврида малика бўлган.
Зубайда ўша даврнинг энг бадавлат ва энг нуфузли аёлларидан бири саналган. Унинг бойлиги ҳақида кўплаб афсоналар тарқалган. Жумладан, улардан бирида Зубайда ҳар хил тадбирлар, хайр-эҳсон ва камбағалларга пул тарқатиш учун 37 миллион дирҳамгача пул сарфлагани келтириб ўтилади.
Топилган тангаларда ўша даврнинг бешта халифаси Абу Жафар ал-Мансур, Муҳаммад ал-Маҳди, Ҳорун ар-Рашид, Муҳаммад Ал Амин ва Абу Жафар Абдуллоҳ Ал Маъамун тасвирланганини маълум қилган.
Қазиш ишлари бошлиғи, доктор Сабоҳ Абуд Жосимнинг сўзларига кўра, топилма бу минтақада Аббосийлар сулоласининг эрта пайдо бўлиши ҳақидаги тахминларни тасдиқлайди. Шунингдек, у тангалар солинган кўза Аббосийлар даврига хос услубда ясалганини ҳам қайд этган. Мутахассис Аббосийлар сулоласи ҳукмронлиги даврида ҳозирги Шаржа вилояти бутун Форс кўрфази учун муҳим савдо маркази бўлганини айтган.
Аввалроқ, Тошкент халқаро аэропортида хорижга кетаётган шахсдан 290 дона турли йилларда зарб этилган қадимий тангалар аниқлангани ҳақида хабар берган эдик.
Муножат Валиева
