Боку тинчлик шартномаси бўйича Ереванга жавоб қайтарди
“Ярашув”да халқаро воситачилар ҳам иштирок этиши мумкин.
Ереван Бокунинг тинчлик шартномаси бўйича таклифларига жавобини олди. Бу ҳақда Арманистон ташқи ишлар вазири Арарат Мирзоян маълум қилди.
“Биз Озарбайжонга муносабатларни тартибга солиш бўйича ўз таклифларимизни, яъни тинчлик шартномаси лойиҳасини тақдим этгандик ва кеча уларнинг жавобларини олдик. Шу боис муҳокамалар давом этмоқда”, — деди у.
Вазирнинг таъкидлашича, Арманистон томони бу масалада имкон қадар тезроқ келишувга эришишга умид қилмоқда.
“Бу жараёнда халқаро ҳамкорларимизнинг воситачилик ҳаракатлари ҳам муҳим рол ўйнаши мумкин”, — дея қўшимча қилган Мирзоян.
Вазир Озарбайжон томонидан қандай жавоб олингани тафсилотларини ошкор қилмаган.
