Бразилияда 15 киши сув тошқини қурбони бўлди
Ҳозир 36 та тўғон авария ҳолатида.
Бразилия жануби-шарқидаги Минас-Жераис штатида кучли ёмғирлар кўчки ва тошқинларни келтириб чиқарди. Бу ҳақда BBC Nеws хабар бермоқда.
Камида 15 киши, жумладан, болалар оғир об-ҳаво шароити қурбони бўлди. Шу билан бирга, 28 мингдан ортиқ аҳоли хавфсиз жойга эвакуация қилиш учун уйларини тарк этган.
Хусусан, Хуатуба шаҳрида дарё қирғоқларидан тошиб, бутун аҳоли тураржойларини сув босган. Ҳозир штатдаги 36 та тўғон авария ҳолатида. Ўз навбатида, олимлар минтақадаги ёмғирли об-ҳавони иқлим ўзгариши билан боғлашмоқда.
Аввалроқ Бразилиянинг Минас-Жераис штатида 8 январь куни Капитолий шаҳри яқинидаги канёнда учта сайёҳлик қайиғи устига қоянинг бир қисми қулагани хабар қилинганди.
