Давлат бошқарувларида қариндош-уруғчиликка чек қўйилиши мумкин
Агар бу тартибга амал қилинмаса БҲМнинг ўн беш бараваридан йигирма бараваригача миқдорда жаримага тортилади.
Айни вақтда непотизм(қариндош-уруғчилик)нинг олдини олиш ва унга йўл қўйган мансабдор шахсларга нисбатан жавобгарлик белгилашни назарда тутувчи қонун лойиҳаси жамоатчилик муҳокамасига тақдим этилган.
Маълумотларга кўра, Коррупцияга қарши курашиш агентлиги томонидан “Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳаси ишлаб чиқилган.
Лойиҳада ўзаро яқин қариндош (тўғри шажара) ва қуда-андалар, ён қариндош (ён шажара) ҳамда қариндошлик риштасига эга бўлган бошқа шахсларнинг бир давлат ташкилоти ва унинг тузилмаларида бирга хизмат қилишни тақиқлаш, бундай ҳолатларга йўл қўйилган тақдирда эса жавобгарликка тортилиш таклиф этилмоқда.
Ўзаро яқин, ён ёки бошқа қариндошлик муносабатларига эга, шунингдек, қуда-анда бўлган шахсларнинг бир давлат ташкилоти ва унинг таркибидаги тузилмалардан бирида ишласа бу ҳақида иш берувчига маълумот бериши зарур. Яъни иш фаолиятида иккинчисига бевосита бўйсуниб ёки унинг назорати остида хизмат қилаётганлиги ҳақида маълум қилиши талаб этилади. Агар бу тартибга амал қилинмаса БҲМнинг ўн беш бараваридан йигирма бараваригача миқдорда жаримага тортилади.
Бундан ташқари, агар шундай ҳол кузатилса, яъни бири иккинчисига бўйсинувчи ташкилотларда ишловчилар орасида қариндошлар борлиги маълум бўлса ва бундан иш берувчи ҳам хабардор бўлса, ўша вақтдан бошлаб мазкур ходимларни ишлаб келган ишига, лавозимига тенг бошқа иш ёки лавозимга ўтказиш чоралари кўрилиши мажбурийдир. Агар бу тартиб бузилса БҲМнинг йигирма беш бараваридан ўттиз бараваригача миқдорда жарима солинишига сабаб бўлади.
Маълумот учун: жамоатчилик муҳокамаси 2021 йил 30 ноябрга қадар давом этади.
Аввалроқ бюрократияга йўл қўйган 38 нафар амалдорга интизомий чора кўрилгани ҳақида хабар берилганди.
Оламгир Абдиев
