Qayd etilishicha, vazirlik va idoralar tomonidan prezidentning tegishli farmoni talablari buzilganligi, ayrim tadbirlar ijrosi taʼminlanmaganligi aniqlandi.
1-iyundan 18 turdagi maʼlumot va hujjatlarni aholi va tadbirkorlik subyektlaridan talab qilish bekor qilinganiga qaramay 3 256 ta holatda hujjatlar aholidan talab qilingan.
O‘rganish yakunida aholidan ortiqcha hujjatlarni talab qilgan 9 ta vazirlik va idoralarning rahbar xodimlari MJtK 2155-moddasiga asosan maʼmuriy javobgarlikka tortildi:
– Bandlik va mehnat munosabatlari vazirligi;
– Innovatsion rivojlanish vazirligi;
– Oliy va o‘rta maxsus taʼlim vazirligi;
– Ekologiya va atrof-muhitni muhofaza qilish davlat qo‘mitasi;
– Moliya vazirligi huzuridagi Davlat-xususiy sheriklikni rivojlantirish agentligi;
– Qishloq xo‘jaligi vazirligi huzuridagi Bog‘dorchilik va issiqxona xo‘jaligini rivojlantirish agentligi;
– Alkogol va tamaki bozorini tartibga solish hamda vinochilikni rivojlantirish agentligi;
– Taʼlim sifatini nazorat qilish Davlat inspeksiyasi;
– Transport vazirligi huzuridagi Yo‘l-qurilish ishlari sifatini nazorat qilish inspeksiyasi.
Aniqlangan qonun hujjatlarining buzilishi, ularning sabablari va bunga olib keluvchi shart-sharoitlarni bartaraf etish to‘g‘risida vazirlik va idoralarga 21 ta taqdimnoma kiritilgan. Natijada, davlat organlari va tashkilotlarining 38 nafar masʼul xodimlariga intizomiy jazo choralari qo‘llanilgan.
"Adliya vazirligi tomonidan qonunchilik hujjatlari va topshiriqlardagi, shu jumladan Prezident hujjatlaridagi har bir topshiriq va ularning nazorat bandlari ijrosi alohida nazoratga olingan", — deyiladi xabarda.
Avvalroq Samarqanddagi ayrim teatr mansabdorlariga jinoiy ish qo‘zg‘atilgani, Qoraqalpog‘istonda transport vaziri va hokim o‘rinbosari jarimaga tortilgani, Samarqanddagi davlat muassasalarida 563 million so‘m byudjet mablag‘lari talon-toroj qilingani aniqlangani hamda aholining davlat xizmatlaridan foydalanish imkoniyatlari kengaytirilgani haqida xabar berilgandi.