Дунёдаги 11 та давлат жосуслик тизими орқали сиёсатчиларни кузатгани маълум қилинди

Нашрнинг келтиришича, «Pegasus»дан сиёсий танқидчиларни кузатган давлатлар орасида бош вазир Виктор Орбан бошчилигидаги Венгрия ҳукумати ҳам бор. Шунингдек, жосуслик дастуридан матбуотга қарши фойдаланишга рухсат берган бошқа давлатлар қаторига Озарбайжон, Қозоғистон, Ҳиндистон, Исроил, Баҳрайн, Мексика, Марокаш, Руанда, Саудия Арабистони ва Бирлашган Араб Амирликлари киритилган.

Таъкидланишича, буни аниқлашда дунёнинг 17 та машҳур нашрлари, жумладан, «The Washington Post», «The Guardian», «Haaretz» каби йирик нашрлар биргаликда ишлаган. Лойиҳа «Amnesty International»нинг техник кўмаги билан Франциянинг «Forbidden Stories» нотижорат ташкилоти томонидан мувофиқлаштирилган.

Таъкидланишича, тергов хакерлик ҳужумига учраган бўлиши мумкин бўлган 50 мингта телефон рақамлари рўйхатига асосланади. ОАВ маълумотларига кўра, рўйхатдаги энг эски ёзувлар 2016 йилга тегишли. Журналистлар 50 дан ортиқ мамлакатда мингдан ортиқ рақам эгаларини аниқлаган. «Amnesty International» таҳлиллари шуни кўрсатдики, журналистларга тегишли камида 23 та телефон «Pegasus» вирусини муваффақиятли юқтирган ва яна 14 тасида хакерлик ҳужумининг аломатлари бор.

Қайд этилишича, Венгрияда «Direkt36» тергов нашрининг икки журналисти телефонлари ҳужумга учраган. Озарбайжонда кузатув олиб борилиши мумкин бўлганлар қаторига 48 нафар журналистлар киритилган, уларнинг аксарияти мамлакатдаги коррупция ва репрессияларни танқид қилган.

Ҳакерлик ҳужуми мақсади нафақат маҳаллий нашрлар, балки халқаро ва йирик миллий нашрлар «CNN», «Associated Press», «Voice of America», «New York Times», «Wall Street Journal», «Bloomberg», «Financial Times», шунингдек, Франциянинг «Le Monde» ва Қатарнинг «Al-Jazeera» канали журналистларига ҳам қаратилган бўлган.

Маълумот учун, ушбу жосуслик дастурий таъминоти фақат давлат идораларига ва фақат Исроил ҳукуматининг рухсати билан сотилади. «Pegasus» барча маълумотларни телефондан олиш имконини беради.