Фарғона ва Тошкентда катта миқдордаги пиротехникалар тўхтатиб қолинди

Божхона органлари томонидан ҳуқуқни муҳофаза қилувчи органлар билан ҳамкорликда пиротехника воситаларининг четдан ноқонуний олиб кирилиши, сақланиши ва айланишига тизимли равишда тезкор тадбирлар ўтказиш орқали қарши кураш олиб борилмоқда. Бу ҳақда вилоят божхона бошқармаси матбуот хизмати хабар берди.

 

“Бошқарманинг Контрабандага қарши курашиш бўлими вилоят ДХХ ва ИИБ ходимлари пиротехника воситаларининг четдан ноқонуний олиб кирилиши ва сақланишига қарши бир қатор тезкор тадбирлар ўтказилди. Фарғона шаҳрида ўтказилган тезкор тадбирлар давомида “Дамас” русумли автотранспорт воситасида четдан ноқонуний олиб кирилаётган ҳамда фуқаронинг Қува туманидаги хонадонида сақланаётган дастлабки қиймати 141 миллион сўмлик 7 турдаги жами 408 минг дона пиротехника воситалари борлиги аниқланиб ашёвий далил тариқасида олинган”, – дейилади хабарда.

 

Вилоятнинг Фарғона туманида ўтказилган тезкор тадбирда “Кобальт” русумли автотранспорт воситаси тумандаги яшаш хонадонларидан бирига кириб хонадондаги товарларни юклаб чиқиб кетмоқчи бўлган вақтида тўхтатилиб, хонадон ва транспорт воситаси холислар иштирокида кўздан кечирилди. Натижада, автотранспорт воситаси ҳамда хонадонда хорижда ишлаб чиқарилган ва четдан ноқонуний олиб кирилган умумий қиймати 95 миллион сўмлик 4 турдаги жами 180 минг дона пиротехника воситалари ашёвий далил тариқасида олинган.

 

Шунингдек, Фарғона туманидаги яшаш хонадони холислар иштирокида кўздан кечирилганида, ушбу хонадонда да ҳам хорижда ишлаб чиқарилган ва четдан ноқонуний олиб кирилган умумий қиймати 28 миллион сўмлик 3 турдаги жами 74 дона пиротехника воситалари сақланаётганлиги аниқланган.

 

“Ўтказилган тезкор тадбирлар натижасида умумий қиймати 264 миллион сўмлик 14 турдаги 588 минг донадан зиёд пиротехника воситаларининг четдан ноқонуний олиб кирилиши ҳамда сақланишига чек қўйилди”, – дейилади хабарда.

 

Ҳозирда мазкур ҳолатлар юзасидан терговга қадар текширув ҳаракатлари олиб борилмоқда.

 

Кийимлар остига яширилган қарийб 175 минг пиротехника воситалари фош бўлди.

 

Бундан ташқари, Тошкент вилояти божхона бошқармаси Контрабандага қарши курашиш тезкор ходимлари, ДХХ Тошкент шаҳар бошқармаси ҳамда ИИБ Йўл патруль хизмати ходимлари билан ҳамкорликда,Тошкент вилояти, Оҳангарон тумани ҳудудида тезкор тадбир ўтказилди. 

 

Тадбир давомида, Оҳангарон туманида “Фарғона-Оҳангарон” йўналиши бўйлаб ҳаракатланиб келаётган фуқаро бошқарувидаги бўлган, “Mercedes Benz Sprinter” русумли автотранспорт воситаси тўхтатилиб холислар иштирокида кўздан кечирилганида, автоулов юк хонасида, хуфиёна тарзда кийим-кечаклар остига яширилган фуқаро Каюмовага тегишли бўлган, Дастлабки ҳисоб-китобларга кўра қиймати 200 млн.сўм бўлган жами 174 108 дона пиротехника воситалари борлиги аниқланиб, ашёвий далил сифатида олинди.

 

Ҳозирда ҳолат юзасидан суриштирув ишлари олиб борилмоқда.