Фарғонада пластик картадан пул ўғирлаган шахс қўлга тушди
Сўнгги пайтларда ўзгалар ишончига кириб, мол-мулкни ўзлаштириш ҳолатларига тез-тез гувоҳ бўлаяпмиз. Жиноятга жазо муқаррар. Буни Фарғонада содир бўлган ҳолат мисолида ҳам яққол кўриш мумкин.
Фарғона вилояти Қува туманида пластик карточкадан пул ўғирлаган шахс қўлга тушди. Бу ҳақда вилоят ИИБ ахборот хизмати хабар берди.
Маълум бўлишича, 14 октябрь куни Р.М исмли аёл ИИБга мурожаат қилиб, 6 октябрь куни номаълум шахс унга тегишли бўлган банк пластик карточкасидан жами 1 миллион 361 минг 700 сўм миқдоридаги пулларини унинг рухсатисиз яширин равишда ўғирлаганини билдирган.
Олиб борилган тезкор қидирув ишлари давомида ушбу жиноятни А.А содир этгани аниқланиб, процессуал тартибда ушланган.
Мазкур ҳолат юзасидан Қува тумани ИИБ ҳузуридаги тергов бўлими томонидан зудлик билан Жиноят кодексининг 169-моддаси 3-қисми "б"банди (ўғирлик) га мувофиқ жиноят иши қўзғатилган.
Жиноят содир этган шахс саккиз йилгача озодликдан маҳрум этилиши мумкин.
Аввалроқ Пешку туманида ижтимоий тармоқ орқали ўғрилик қилган шахс қўлга олингани, Бухорода интернетдаги ютуқли ўйинлар орқали фуқарони чув туширган шахс ушлангани, сохта хайрия акцияси уюштириб, 11 млн сўмни ўзлаштирган йигит аниқлангани ҳамда Андижонда виртуал фирибгар қўлга олингани ҳақида хабар берилганди.
