Ижтимоий тармоқларга шахсий маълумотларни қўйишда эҳтиёт бўлинг — ИИВ

Сўнгги вақтларда Telegram ижтимоий тармоғида товламачилик йўли орқали даромад орттириш мақсадида айрим шахслар ижтимоий муҳандислик услуби билан фуқароларнинг шахсий ҳаётига оид маълумотларни (фотосурати, исми, шарифи, телефони, манзили ва бошқалар) тўплаб, кейинчалик уларни шаъни ва обрўсига путур етказувчи “пост”лар кўринишида ижтимоий тармоқларда тарқатмоқда.

Сўнгра бу маълумотларни тарқатмаслик эвазига пул маблағларини талаб қилаётганлиги кузатилмоқда.

Ҳозирда бундай каналлардан бир нечтаси аниқланган ҳамда уларни юритувчилар хориж давлатларидан туриб фаолият кўрсатишади.

Ички ишлар вазирлиги томонидан ушбу ва бошқа турдаги жиноий фаолият билан шуғулланувчи барча каналларнинг эгалари электрон манзиллари аниқланиб, ўрнатилган тартибда терговга қадар текширувлар ўтказилмоқда.

Текширув якунлари натижасида товламачилик қилаётган шахсларга нисбатан қонуний чора кўрилади.

Аммо ҳозирги кунда мазкур жиноий каналларни блоклашнинг техник имкониятлари мавжуд эмас. Шунинг учун каналлар номи ошкор этилмайди.

Аввалроқ, Facebook'да Шавкат Мирзиёев номи билан сохта аккаунт очиб фирибгарлик қилган ҳамда Пешку туманида ижтимоий тармоқ орқали ўғирлик қилган шахс қўлга олингани ҳақида хабар берилганди.

Чўлпоной Аҳмедова