Покистон бош вазири Имрон Хон Ғарб давлатларини кескин танқид қилди. Бу ҳақда The Times’га асосланиб “РИА Новости” хабар берди.
Ғарбнинг 22 давлати Исломободдан Россиянинг Украинадаги ҳаракатларини қоралашга қаратилган БМТ резолюциясини қўллаб-қувватлашни сўраб мурожаат қилгани танқидга сабаб бўлган.
“Биз ҳақимизда қандай фикрдасиз? Биз сизга айтганини бажарадиган қулмизми?”, – деган у.
Имрон Хон Покистон сўнгги бор Ғарбни Афғонистонда қўллаб-қувватлаганини, шундан кейин мамлакатга норозилик ва зўравонлик тўлқини кириб келганини қўшимча қилган.
Эслатиб ўтамиз, аввалроқ Россия самолётларининг Британия осмонида учиши жиноят деб эълон қилингани тўғрисида хабар берилганди.