Kобулдаги Қозоғистон элчихонаси фаолиятини ҳамон давом эттирмоқда
Қозоғистоннинг Kобулдаги элчихонаси элчиси бошчилигида фаолият юритмоқда. Ҳозирга қадар ходимларнинг бир қисмигина мамлакатга жўнатилган.
Қозоғистон ташқи ишлар вазирлиги вакили Айбек Смадияров "Элчимиз Kобулда ишлашда давом этади. У ерда ходимларнинг бир қисми қолади", - дея маълум қилган.
Шунга ўхшаш қарор бошқа бир қатор мамлакатлар, жумладан, Дания, Норвегия ва Чехия томонидан қабул қилинди. Қўшма Штатлар мамлакатдаги дипломатик иштирокини ҳам қисқартирмоқда-ҳарбийлар фуқароларни эвакуация қилиш учун юборилган. Буюк Британия ҳам Афғонистондаги дипломатик миссиясини тугатишга қарор қилди. Бунга Афғонистонда "Толибон" ҳаракати жангарилари томонидан ҳужум қилиниши сабаб бўлмоқда.
Турли манбаларга кўра, “Толибон” мамлакат ҳудудининг 90% га яқини, жумладан, Эрон, Хитой, Покистон, Тожикистон ва Туркманистон чегарасидаги ҳудудларни назорат қилмоқда. Улар мамлакат вилоятларининг ярмидан кўпини қўлга киритган, дея хабар бермоқда "ТАСС".
Бир кун аввал толиблар томонидан Мозори Шариф шаҳрининг қўлга олингани маълум қилинди.
Маълумотларга кўра, ҳукумат кучлари шаҳарни деярли жангсиз қарши тарафга топширган. Ҳарбийлар ва ҳукумат вакиллари Ўзбекистон чегарасига келган. Аввалроқ Ўзбекистон Ташқи ишлар вазирлиги Ўзбекистон ва Афғонистон чегарасидаги вазият ҳақида расмий маълумот берди. Унга кўра Афғонистон ҳарбийларининг 84 нафари чегарадан ўтган. Уч нафарига тиббий кўмак кўрсатилган.
