Кореяга ўқишга юборишни ваъда қилган фирибгарнинг ҳийласи иш бермади
Фирибгар "юқорида" танишлари борлигини важ қилиб, фуқаронинг ишончига кирган.
Бош прокуратура ҳузуридаги Департаментнинг Олмазор туман бўлими томонидан фуқароларнинг ҳуқуқ ва манфаатларини ҳимоя қилиш юзасидан ўтказилган терговга қадар текширувда, фуқаро Ф.M. С.М.нинг ишончига кириб, уни юқори лавозимда ишловчи танишлари орқали Жанубий Корея Республикасига ўқишга юборишини ваъда қилиб, эвазига 2 300 АҚШ долларини фирибгарлик йўли билан қўлга киритганлиги аниқланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бухорода ўқишга киритиб қўйишини айтиб, фуқародан 300 АҚШ доллар сўраган ҳамда Фарғонада “auksion” орқали арзон ер майдони олиб бераман, деб 60 миллион сўмни қўлга киритган шахс ушлангани ҳақида хабар бергандик.
Муножат Валиева
