Карло Анчелотти "Реал Мадрид" билан ўзининг 12-кубогини қўлга киритди. Италиялик мураббий бу кўрсаткич бўйича Зинедин Зиданни (11 соврин) ортда қолдириб, иккинчи ўринга чиқиб олди. Энг яхши натижа 1970-1984 йилларда "Реал Мадрид" мураббийи сифатида 14 марта боши узра турли кубокларни кўтарган Мигел Мунёсга тегишли. Анчелотти 2013 йилдан 2015 йилгача Мадрид клубида ишлаган. Бу даврда италиялик мураббий тўртта совринни қўлга киритди. Бироқ, бирон марта Испания чемпионлигини қўлга кирита олмади. Бошқа томондан, Карло ўз номини "Реал Мадрид" тарихига абадий ёзиб қолдирди. Айнан у жамоага Чемпионлар Лигасидаги 10-ғалабани олиб келди. Анчелотти 2015 йилда "Реал Мадрид" билан бир йил давомида бирорта соврин юта олмаганидан сўнг клубни тарк этади.
"Сизларга шуни маълум қилмоқчиманки, "Реал Мадрид" директорлар кенгаши Карло Анчелоттини истеъфога чиқаришга қарор қилди. Бу қарорни қабул қилиш жуда қийин кечди. Бизда жуда катта талаблар бор - "Реал" ҳар доим совринларни қўлга киритишни хоҳлайди", - деганди ўшанда "Реал Мадрид" президенти Флорентино Перес.
Анчелотти 6 йилдан сўнг яна "Реал"га қайтди. Бу вақт ичида у "Бавария", "Наполи" ва "Эвертон"да ишлади. Аммо бу даврларни ижобий баҳолаш қийин. Карло ҳеч қачон немис клуби билан Чемпионлар лигасида ғалаба қозонмаган. Шунингдек, "Наполи" ва "Эвертон" билан ҳам ҳеч қандай соврин ютмаган. Мадридга қайтишдан олдин Анчелотти Ливерпул клуби билан Премьер-лигада 10-ўринни эгаллади. "Реал Мадрид" ўтмиши шонли, аммо сўнгги йиллардаги паст кўрсаткичлари сабабли мураббийни ижарага олди. Айримлар Карло энди Европанинг топ-клублари билан ишлашга тайёр эмас деган фикрларни билдиришди. Шу тариқа Анчелотти "Реал"ни иккинчи марта тарк этган Зиданнинг ўрнига ишга олинади. "Тhe Atletic" хабарига кўра, Зидан кетганидан кейин Анчелотти "Реал"нинг биринчи танлови ҳисобланмаган. Матбуотда Антонио Конте, Маурисио Почеттино, Массимилиано Аллегри ва ҳатто клуб афсонаси Раул ҳам пайдо бўлганди. Натижада Аллегри "Ювентус"га қайтди ва Конте эса назорат ва шартномалар имзолаш борасида юқори талаблар қўяди. Клубнинг ўша пайтдаги оғир молиявий аҳволини тушуниб, бунга ишониш қийин эди.
Зидан кетишини эълон қилганидан кейин бир неча кун давомида Испания матбуотида Анчелотти номи эълон қилинмади. Кейин эса бирдан Карло "Эвертон"ни тарк этиб, "Реал"га қайтиши ҳақида хабар пайдо бўлди. Анчелотти "Реал"даги илк фаолияти давомида ҳамма билан яхши тил топиша олгани муваффақият калити эди. Зидан иккинчи марта кетганидан сўнг, мадридликлар янги ғояларга эга мураббийнинг пайдо бўлишига умид қилишган. Ёш футболчиларни тарбиялашда аниқ тактик режа ва тажриба зарур эди. Айнан шу сабабдан Конте ва Почеттино даъвогарлар қаторидан жой олди, аммо якунда иккаласи ҳам Мадридга келишмади.
Анчелотти қайтганидан кейин Испания нашрлари турли фикрларни билдиришади.
"Мундо Депортиво": “Карлони 2013 йилда Моуриньо қолдирган "олов"ни ўчириш учун чақиришди. Энди италияликнинг тайинланиши кўплаб саволлар туғдиради, чунки у на биринчи, на иккинчи, на учинчи вариант эди. Италиялик футболчининг келиши клубнинг ноаниқ спорт келажагини мустаҳкамлаш заруратидан кўра, ўтмишдаги муваффақиятларга бўлган носталжи билан боғлиқ. У "Эвертон"даги қийин вазиятидан кейин буюк клубни бошқаришга тайёрми? Зидандек афсонанинг кетиши клубни қийин аҳволга солиб қўйди. Агар италиялик мураббийга қилинган таваккал ўз самарасини бермаса, Флорентинонинг узрлари ўтмайди ва асосий айбдор сифатида кўрсатилади. Шу ўринда савол туғилади: Анчелоттининг қайтишидан "Реал" кўпроқ фойда оладими ёки йўқотадими?”, - дейилади нашр эълон қилган материалларнинг бирида.
"АС": “Перес Анчелоттининг қайтишидан фойдаланиб, Зидан кетганидан кейин юзага келган кескинликни юмшатди. Бир подшоҳ ўлса, унинг ўрнига бошқаси келади. Карло муваффақият тўлқинида қайтмоқда, деб айтиш қийин, ахир, "Эвертон" билан 10-ўрин фахрланиш учун сабаб эмас. Аммо умуман олганда, унинг карераси жуда кўп муваффақиятли натижалар бой.
Сўнгги хабарларга кўра, Анчелотти "Реал" билан музокаралар чоғида қўшимча шартлар қўймаган. Бу фавқулодда ҳолатга айланди. Мураббий ўз клуби ҳар қандай шароитларга мослашишга тайёрлигини кўрсатди. Испанияда мутахассислар Анчелотти энг қийин вазиятга дуч келишини айтишган, чунки клубнинг қарзлари унинг трансфер бозорида катта юришларга йўл қўймаслигини таъкидлашади. Италиялик қайтганидан кейинги биринчи мавсумда "Реал" Чемпионлар лигасида ва Испанияд чемпионга айланади. 2023 йилнинг март ойида агар клуб муҳим совринни қўлга кирита олмаса, "Реал" Анчелоттини истеъфога чиқариши мумкинлиги ҳақида маълумот пайдо бўлди. Бир йил аввал Чемпионлар лигасида ғолиб чиққан мураббийни ишдан бўшатиш қанчалик адолат меъзонлари тўғри келади? Бироқ, бу ҳолат амалга ошмади ва "Реал" Испания кубогини қўлга киритди. Энди Анчелотти иккинчи марта мамлакат чемпионига айланди ва унинг жамоаси Чемпионлар лигасида навбатдаги ғалабага жуда яқин турибди. Қизиқ, агар Перес 3 йил олдин бошқа мураббий тайинлаганида "Реал Мадрид"нинг натижалари қандай бўларди?