КХДР янги ракета синови ўтказишга тайёр – Жанубий Корея ва АҚШ разведкаси
Пхеньян охирги марта 5 март куни ракета учирганди.
Шимолий Корея шу ҳафтада яна ракета синовлари ўтказиши мумкин. бу ҳақда Yonhap агентлиги хабар берди.
“Аниқ вақтни айтиш қийин, аммо АҚШ ва Корея Республикаси разведкаси яна бир (ракета) синови ўтказилиши имкониятига тайёр ҳамда вазиятнинг ўзгаришини доимий равишда кузатиб боряпти. Биз тўлиқ тайёргарликни сақлаб қолганмиз”, – деган Жанубий Корея штаб бошлиқлари Қўмитаси вакили.
Yonhap маълумотларига кўра, ноқулай об-ҳаво шароитларига қарамай, Пхеньян навбатдаги ракетани учиришга тайёр.
11 март куни Вашингтон ва Сеул КХДРнинг 27 февраль ҳамда 5 мартдаги ракета синовларини муҳокама қилганди. АҚШ Шимолий Корея тез орада “космик ракета ниқоби остида тўлиқ узоқликдаги ракета синови ўтказиши” эҳтимоли борлигини тахмин қилган.
Эслатиб ўтамиз, аввалроқ АҚШ Шимолий Корея билан ҳеч қандай шартларсиз муҳокама ўтказишга тайёрлиги тўғрисида хабар берилганди.
