Қўшма Штатлар Корея ярим оролини ядросизлантириш бўйича КХДР билан музокаралар олиб боришга тайёр. Бу ҳақда АҚШ Мудофаа вазирлиги матбуот котиби Жон Кирби Fox News телеканали орқали маълум қилди.
“Биз Корея ярим оролини ядросизлантириш, шунингдек, Пхеньян билан музокаралар олиб бориш тарафдоримиз”, — деди Кирби.
Унинг эслатишича, Қўшма Штатлар ҳеч қандай дастлабки шартларсиз Шимолий Корея билан музокаралар столига ўтиришга тайёр. Айни вақтда Вашингтон Япония ва Жанубий Корея билан Пхеньяннинг ракета учиришларига жавоб бериш вариантларини муҳокама қилмоқда.
Эслатиб ўтамиз, аввалроқ КХДР навбатдаги ракетани учирганидан кейин, Япония Миллий хавфсизлик кенгаши йиғилиш чақирган эди. Баллистик ракета тахминан 800 километр масофани босиб ўтган ва максимал парвоз баландлиги икки минг километрга етган.
Аввалроқ Ироқ ва Сурияда ИШИД хавфи юқори эканлиги ҳақида хабар берилганди.
Насиба Тўхтаева