"Марказий Осиё ва глобал дунё ёшлар нигоҳида" конференцияси иш бошлади
Унда Ўзбекистон ва Қозоғистон ёшлари иштирок этмоқда.
Бугун, 16 ноябрь куни Тошкент шаҳридаги Hilton меҳмонхонасида Тараққиёт стратегияси маркази ва Фридрих Эберт фонди ҳамкорлигида ташкил этилган "Марказий Осиё ва глобал дунё ёшлар нигоҳида" мавзусида конференция очилди. Унда Тараққиёт стратегияси маркази ижрочи директори Элдор Туляков ва Германия Федератив Республикасининг Узбекистондаги фавқулодда ва мухтор элчиси Доктор Тино Клиннер иштирок этди.
Доктор Тино Клиннер Марказий Осиёнинг ўзига хос географик жойлашувига тўхталиб ўтди. Энг аввало Минтақанинг Евроосиё марказида жойлашганлигига ва катта транзит салоҳиятига эгалиги айтилди. Клиннер Темурийлар ҳукмронлиги даврида Марказий Осиё дунёдаги йирик маданий марказлардан бири бўлганлиги алоҳида таъкидланди.
Шу билан бирга ҳозирда минтақа катта потенциалга эгалиги ва ундан тўғри фойдаланиш зарурлиги қайд этилди. Бунинг учун эса давлатлар ўртасида интеграцион жараёнларни чуқурлаштириш керак.
Элдор Туляков сўнгги йилларда Президент Шавкат Мирзиёев ташаббуси билан минтақада интеграцион жараёнлар кетаётганини ва кўплаб масалалар биргаликда ҳал этилаётганига эътибор қаратди. Шунингдек, Ўзбекистон етакчиси нафақат мамлакат ва минтақада, балки бутун дунёда ёшлар масаласини кўтараётгани таъкидланди.
“Айниқса, аҳолисининг 60 фоизидан ортиғини ёшлар ташкил этадиган ёшлар масаласи ниҳоятда долзарб”, – деди Туляков.
Аввалроқ Ёшлар ва хотин-қизларга тадбиркорликни бошлаш учун таъминотсиз кредит ажратилиши ҳақида хабар қилинганди.
Жаҳонгир Қўзиев
