Meta Twitterʼнинг аналогини ишга туширди

 

Facebook ва Instagramʼга эгалик қилувчи Американинг Meta компанияси 6 июлга ўтар кечаси Twitterʼнинг асосий рақобатчисига айланиши керак бўлган Threads матнли хизматини ишга туширди. Meta Twitterʼга ўхшаш интерфейсга эга бўлган янги хизмат 500 та белгигача бўлган хабарларни, шунингдек, 5 дақиқагача бўлган фотосуратлар ва видеоларни жойлаштириш имконини беришини эълон қилди.

 

Instagram жамоаси томонидан ишлаб чиқилган илованинг ўзи ўзини ижтимоий тармоқнинг кенгайтмаси сифатида кўрсатади:

 

«Threads бўйича бизнинг қарашимиз Instagram энг яхши қиладиган нарсани олиш ва уни матнга кенгайтириш, ғояларингизни ифодалаш учун ижобий ва ижодий майдон яратишдир», — дейилади компания пресс-релизида.

 

Қайд этилишича, 6 июлдан бошлаб илова 100 дан ортиқ мамлакатларда, жумладан АҚШ, Буюк Британия, Австралия, Канада ва Японияда App Store ва Google Playʼдан юклаб олиш мумкин. «ТАСС»нинг ёзишича, Threads Россияда ҳам мавжуд, бироқ у фақат VPN билан ишлайди.

 

Шунингдек, хизмат Европа Иттифоқида ҳали ишламайди. Insragram бош директори Адам Моссери The Verge нашрига бу қарорга 2024 йилда кучга кириши керак бўлган баъзи Европа қонунлари сабаб бўлганини айтди. Meta асосчиси Марк Сукербергнинг сўзларига кўра, ишга туширилгандан кейинги дастлабки тўрт соат ичида иловада беш миллиондан ортиқ аккаунт рўйхатга олинган.

 

Айни дамда Threadsʼнинг ишга туширилиши Tesla ва SpaceX асосчиси Илон Маск ижтимоий тармоқни 2022 йилнинг кузида сотиб олганидан кейин Twitterʼда содир бўлаётган воқеалар билан боғлиқ. Маск бошчилигида Twitter фойдаланувчиларнинг турлича муносабатига сабаб бўлган бир қатор ўзгаришларга дуч келди, хусусан, микроблоглар хизмати кўпроқ пуллик обуначиларга эътибор қаратишга қарор қилди.