Америкалик тарихчи олим 11—12 декабрь кунлари Тошкент шаҳрида ўтказилаётган “Жадидлар: миллий ўзлик, истиқлол ва давлатчилик ғоялари” мавзусидаги илмий конференция ҳақида гапирди.
"Хорижда жадидлар мавзусига оид докторлик иши бошлаганимда бир ўзим бўлганман. Ўзбекистон мустақилликка эришгандан кейинги даврда ҳам бу ерга саёҳат қилиш осон бўлмаган.
Кейинроқ жадидчилик билан қизиқувчилар саноқли бўлди. Ҳозир жадидларнинг қилган ишлари ўрганилиб, китоблар нашр этилмоқда. Ўзбекистон президенти Шавкат Мирзиёевнинг жадидларга урғу бериши таҳсинга лойиқ. 11–12 декабрь кунлари Тошкентда бўлиб ўтадиган конференция ҳам айнан президент ташаббуси билан бўлмоқда. Бугун дунёдаги барча жадидшунослар Тошкентга йиғилган. Биз икки кун давомида жадидлар илгари сурган ғоя ва қилган ишларини муҳокама қиляпмиз. Қолаверса, жадидчилик билан қизиқувчи кўплаб ўзбек олимлари иштирок этаётган тадбирни жуда юқори савияда кўриш — мен учун жуда ажойиб", - дейди олим.
Маълумот ўрнида: Адиб Халид Покистонда туғилиб ўсган, инглиз ва урду тилини она тилидек билувчи, ўзбек, турк, рус, форс, немис ва француз тилларини профессионал даражада ўзлаштирган бу тарихчи олим бутун илмий фаолиятини Туркистон халқлари тарихини ўрганишга бағишлаган. Олимнинг “Ўзбекистоннинг барпо бўлиши” номли асари яқин тарихимизни ўрганишда, Миллий истиқлол қаҳрамонларини танишда ҳамда берилган қурбонликларни ҳис қилиш йўлида, том маънода, катта янгилик бўлган.