Бош вазир Тел-Авив судида унга қарши очилган мансабни суиистеъмол қилиш, коррупция ва фирибгарликкак оид учта иш бўйича биринчи кўрсатмаларини берди. Бинямин Нетаняҳу ўзига қўйилган айбловларни “ёввойи ва кулгили”, суд жараёнининг ўзини эса “бемаънилик” деб атади. Шунингдек, у “етти фронтда уруш олиб бориб, мамлакатни бошқараётганини” айтди.
Суд мажлислари хавфсизлик нуқтаи назаридан Иерусалимдан кўчирилган ер ости суд залида бўлиб ўтди. Бинода Нетаняҳунинг бир неча ўнлаб тарафдорлари ва мухолифлари йиғилди. Мухолифат сиёсатчи устидан суднинг адолатли кўрилишини талаб қилди.
Навбатдаги йиғилиш бугун, 11 декабр куни бўлиб ўтади. Бош вазир декабр ойининг охиригача ҳафтасига уч марта, кунига олти соатдан гувоҳлик бериши керак. Ишни кўриб чиқиш бир неча йилга чўзилиши мумкин.