Никол Пашинян Илҳом Алиев билан чегарада учрашмоқчи
Арманистон Бош вазири Озарбайжон билан тўғридан-тўғри музокаралар ижобий натижа бераётганини таъкидлаган.
Арманистон Бош вазири Никол Пашинян музокараларни давом эттириш учун Озарбайжон Президенти Илҳом Алиев билан икки давлат чегарасида учрашишга тайёр.
"Арманистон Лондондаги музокаралардан бош тортди, деган таассурот яратишга ҳаракат қилинди. Биз рад қилмадик. Арманистон учрашувни икки томонлама форматда ўтказишни таклиф қилди, чунки бу форматда ишлаш бўйича келишув мавжуд эди. Ўйлайманки, биз шу йўлни давом эттиришимиз керак, чунки бу натижа беради. Саммитни ўтказиш учун вақт етиб келганида, уни Арманистон-Озарбайжон чегарасида ташкил қилиш мумкин", - деди Пашинян.
Пашиняннинг сўзларига кўра, Озарбайжон билан тўғридан-тўғри музокаралар ижобий натижалар бермоқда.
"Озарбайжон билан икки томонлама ҳамкорлик узоқ вақтдан бери давом этаётганини ва бу ижобий натижалар бераётганини таъкидлашим керак, сиз ҳам эътибор бергансиз. Бу ўтган декабрдаги қўшма баёнотлардан бошланиб, 2024 йил 19 апрелдаги баёнот билан давом этади. Куни кеча делимитация комиссияси фаолияти тўғрисидаги низом имзоланди. Икки томонлама формат ўз натижасини берар экан, биз уни давом эттирамиз", - деди Пашинян.
