Олмалиқда қимматбаҳо металл ўғрилари қўлга олинди
Улар салкам 120 млн сўмлик саноат маҳсулотини ўмаришган.
ДХХнинг Тошкент вилояти бошқармаси ходимлари ва бошқа ҳуқуқни муҳофаза қилувчи органлар ҳамкорлигида тезкор тадбир ўтказилди. Унда қимматбаҳо металл ўғриларини қўлга олинган.
Маълум қилинишича, oлмалиқлик фуқаро “Олмалиқ КМК” АЖнинг бир гуруҳ ишчилари билан жиноий тил бириктирган. У “Олтин ва кумушни афинажлаш цехи”нинг кийим алмаштириш хонасига қимматбаҳо металл – саноат қумларини яшириб қўйгани фош бўлган.
Ҳуқуқни муҳофаза қилувчи органлар ходимлари томонидан ушбу ячейканинг пастки қисмида перчаткада жойлаштирилган умумий оғирлиги 4 кг 435 гр саноат маҳсулоти – шлам процессуал тарзда расмийлаштириб олинган. Лаборатория таҳлили натижаларига кўра, ушбу саноат қумлари таркибида умумий нархи 117,5 млн сўмлик 160,5 гр қимматбаҳо металллар мавжудлиги аниқланган.
Фуқаро Чирчиқ шаҳрида “Олмалиқ КМК” АЖнинг қўриқлаш хизматига бўлиб ўтаётган қабулга қатнашиш учун келган вақтида қўлга олинган. Ҳозирда мазкур ҳолат юзасидан Жиноят кодексининг тегишли моддалари билан жиноий иш қўзғатилган.
