26 декабрь Озарбайжонда мотам куни деб эълон қилинди. Тегишли қарорни Озарбайжон Президенти Илҳом Алиев имзолаган. Бу ҳақида “Caliber” хабар берди.
Бугун Боку-Грозний йўналишида парвоз қилган "Embraer 190" йўловчи самолётининг ҳалокатга учраши оқибатида кўплаб одамлар қурбон бўлгани сабабли Озарбайжонда мотам эълон қилинди.
Аввалроқ Озарбайжон авиакомпаниясининг Боку-Грозний рейси бўйича учаётган самолёти Қозоғистонда ҳалокатга учрагани хабар қилинган эди. Маълумотларга кўра, қулаган самолёт бортида 67 йўловчи ва 5 экипаж аъзоси бўлган. Қозоғистон ФВВга кўра, 32 нафар йўловчи омон қолган ва улар шифохонага етказилган. Самолёт йўловчиларидан 37 киши Озарбайжон, 16 киши Россия, 6 киши Қозоғистон ва 3 киши Қирғизистон фуқароси бўлган. Омон қолганлар орасида 14 нафар Озарбайжон фуқароси, 10 нафар Россия фуқароси, 2 нафар Қирғизистон фуқароси бор. Уч нафар жароҳатланган шахснинг фуқаролиги ҳозирча аниқланмаган.