«Ўзбек тилининг изоҳли луғати» илк бор лотин ёзувида чоп этилди
Янги нашр 6 жилддан иборат ва унга 5 000 га яқин янги (жами 80 мингдан ортиқ) сўз киритилди.
Фанлар академиясида янгиланган ва лотин ёзувига асосланган ўзбек алифбосида илк бор чоп этилган «Ўзбек тилининг изоҳли луғати»нинг тақдимоти ўтказилди.
2020 йилда нашр этилган «Ўзбек тилининг изоҳли луғати» кирилл ёзувида 5 жилддан иборат бўлган бўлса, бу нашр 6 жилддан иборат ва унга 5 000 га яқин янги сўз (жами 80 мингдан ортиқ сўз) киритилди.
Изоҳли луғат Вазирлар Маҳкамаси ҳузуридаги Ўзбек тилини ривожлантириш жамғармаси, Фанлар академияси ҳамда Ғафур Ғулом номидаги нашриёт-матбаа ижодий уйи ҳамкорлигида тайёрланган.
Изоҳли луғатнинг дастлабки жилдларини тайёрлашда марҳум олимлар – академик Азим Хожиев, академик Тўра Мирзаев, академик Эрнис Бегматов бевосита иштирок этган.
