Ўзбекистондаги лифтларнинг 78 фоизи техник синовдан ўтказилмаган
Лифтларнинг 52 фоизида техник паспорт йўқ, 65 фоизида эса техник хизмат кўрсатувчи мавжуд эмас.
Сўнгги икки йил давомида республикада ўрнатилган 11,4 мингта лифтнинг 8,9 мингтаси (78 фоиз) ҳали ҳам техник синовдан ўтказилмаган. Бу ҳақда Техник жиҳатдан тартибга солиш агентлиги ахборот хизмати раҳбари Рауфжон Расулов маълум қилди.
Шунингдек, лифтларнинг 6 мингтасига (52 фоиз) техник паспорт мавжуд эмас, 7,4 мингтасига эса (65 фоиз) техник хизмат кўрсатувчи ташкилот бириктирилмаган.
Лифт хавфсизлигини таъминлаш борасида халқаро стандартларга мос равишда бутунлай янги тизим жорий қилинмоқда. У Европа Иттифоқи ва Туркиянинг илғор тажрибаларига асосланиб, лифтларнинг бутун ҳаётий цикли — лойиҳалашдан тортиб утилизацияга қадар бўлган босқичларда хавфсизликни кафолатлашга қаратилган.
Шу билан бирга, мамлакатдаги мавжуд лифтларнинг техник кўрикдан ўтказилиши ва сервис хизматлари самарадорлиги паст экани қайд этилди. Шу сабабли, Туркия, Хитой ва БАА тажрибасига асосланган янги тизим жорий қилинмоқда.
