«Ўзгидромет» директори Шерзод Ҳабибуллаевнинг хабар беришича, 26-28 август кунлари Ўзбекистон ҳудудига нам ва салқин ҳаво массалари кириб келади.
Натижада республика ҳудуди бўйича 26-27 августда шамол тезлиги 17-22 метр/секундгача кучайиши кутилмоқда, баъзи жойларда 23-25 метр/секундгача кучайиши, айрим жойларда чанг-тўзонлар билан кузатилиши мумкин.
Салқин ҳаво массалари кириб келиши натижасида 27-28 август кунлари кундузи ҳаво ҳарорати 23-28 даражагача пасаяди.
«26 августда республика шимолида ва чўл ҳудудларда, 27-28 августда қолган ҳудудларда вақти-вақти билан ёмғир ёғади, момақалдироқ бўлиши мумкин. Тоғ олди ва тоғли ҳудудларда ёмғир ёғади, баъзи жойларда кучли бўлади», — дейилади хабарда.
Кутилаётган кучли ёмғирлар ёғиши ҳисобига республиканинг тоғ олди ва тоғли ҳудудларида 27-29 август кунлари сел-сув тошқин ҳодисалари юзага келиши мумкин.
Гидрометеорология хизмати тоғ олди ва тоғли ҳудудларда истиқомат қилувчи фуқаролар, дам олувчилар ҳамда тоғли худудларда ҳаракатланувчи ҳайдовчилардан эҳтиёткорлик чораларини кўришни сўраган.