Толиблар эгаллаган ҳудудларда бўш уйларга дуч келишган. Катта таҳмин билан аҳоли тоғларга чиқиб кетган. Аннабада турган “Толибон” вакиллари аҳолини уйларига қайтишга чақирган. Уларнинг таъкидлашича, қурол кўтарганларнинг барчаси таслим бўлгандан сўнг афв этилади.
Куннинг биринчи ярмида Аҳмад Масъуднинг Панжшер маркази Базарак яқинида пайдо бўлган суратлари тарқалди. Масъуд Паранд аҳоли пунктидаги блокпостларни кўздан кечирган. Бундан шуни хулоса қилиш мумкинки, толиблар вилоят марказига яқинлашиб қолган.
Қандаҳор вилояти кенгашининг собиқ раиси Сайид Жон Ҳақризвол “Толибон” билан бирга ҳаракат қилаётган пуштунларни қоралаб чиқди. Унинг сўзларига кўра Панжшердаги уруш тарихда пуштунлар номи қора бўлишига сабаб бўлади.
Маълумот ўрнида: “Толибон” 15 август куни Кобул шаҳрини жангсиз эгаллагандан кейин бутун Афғонистонда ҳокимияти ўрнатилганини эълон қилди. Ҳозирда фақатгина Панжшер вилояти толиблар томонидан бўйсундирилмаган. Бу ерда Амрулла Солиҳ ва Аҳмад Масъуд бошчилигида қаршилик фронти тузилган.
Эслатиб ўтамиз, бундан аввал 8 сентябрь куни “катта еттилик”нинг Афғонистондаги вазият юзасидан учрашув ўтказиши хабар қилинган эди.