Путиннинг махсус вакили Афғонистонни тиклашда асосий ёрдамни қайси давлат кўрсатиши шартлигини маълум қилди
АҚШ ва унинг иттифоқчилари Афғонистонни тиклаш бўйича харажатларнинг асосий қисмини ўз зиммасига олиши зарур. Бу ҳақда РФ Президентининг Афғонистон бўйича махсус вакили Замир Кабулов маълум қилди.
"АҚШ ва иттифоқчиларда ўзларининг Афғонистондаги иштироки оқибатларини бартараф этиш учун яхши имконият бор. Бунинг учун улар мамлакат тикланиши ва гуманитар ёрдам учун зарур харажатларнинг асосий қисмини ўз зиммасига олиши зарур", — деган Кабулов.
Бундан аввал Россия ташқи ишлар вазирлиги расмий вакили Мария Захарова ҳам Афғонистонга асосий ёрдамни АҚШ бериши зарурлигини айтган. Россия ва бошқа бир қатор давлатлар Афғонистондаги мавжуд вазиятда Вашингтонни асосий айбдор сифатида кўрсатмоқда.
Бундан аввал Ўзбекистон ташқи ишлар вазирлиги АҚШ давлат департаменти билан Афғонистон масаласини муҳокама қилгани ҳамда Кобулда портлаш содир этилгани хабар қилинганди.
Жаҳонгир Қўзиев
