Икки яшар ўғлига жиддий шикаст етказган ота билан боғлиқ ҳолат юзасидан текширув ўтказилмоқда
Қашқадарё вилояти Деҳқонобод туманида 22 сентябрь куни фуқаро Д.Ш. 2 ёшли ўғлини уриб, кўзини кўр қилгани айтилди. Бу ҳақда “Nasafnews”га боланинг яқинлари хабар берди.
Маълум бўлишича, Ҳ.Э. исмли бола ҳозирда Республика шошилинч тиббий ёрдам илмий маркази Қарши филиалидаги бўлимда кома ҳолатида қолмоқда. Унга шифокорлар имкон борича ёрдам қилишмоқда. Аммо боланинг аҳволи жуда оғир. Оила бекаси С.Ж. воқеага қуйидагича изоҳ берди:
“2 нафар фарзандим бор. Турмуш ўртоғим 2 та мактабда дарс беради. Воқеа содир бўлган куни соат 4 ёки 5 атрофида ишдан қайтди. Икки боламнинг бирови бешикда эди. Бирови ерда эди. Мен эрим қараб туради деб ўйлаб, ташқарига чиқдим ва молларга қарадим".
Қайд этилишича, 20 дақиқа ичида ота боласини уриб, кўзини кўр қилиб, мазь суртган. Боланинг иккки кўзи кўрмай қолган. Бўғиб, бошига қаттиқ урган, ва ёнида турган тикув машинасига урган, бола отилиб кетган. Кейин кўрпачага ўраб, ҳушидан кетказиб, ётқизиб қўйилган.
Воқеа пайтида она боласини икки соат давомида ўзи ҳушига келтиришга ҳаракат қилган. Аммо эртаси куни шифокорга олиб борилганда, боланинг аҳволи оғирлиги айтилган.
Ҳолат ўрганилганда, жабрланувчи 2 ёшли бола ўта оғир аҳволда бўлган. Боланинг бўйин соҳалари кўкарган, оғиз қисми ва кўзларига оғир тан жароҳатлари етказилган.
“Шифохонага 23 сентябрь куни олиб келинди. Онасининг сўзига қараганда, икки кун олдин ўз отаси болани уйида бўғиб, жонига қасд қилмоқчи бўлган. Олиб келинганда бола ҳушсиз, кома ҳолатида, ҳеч қандай ҳаракат йўқ эди. Бошларида шишиш, юзлари кўкариб, бўйнининг тагида кўкаришлар борлигини кўрдик. Шу кунгача ҳамма керакли тиббий хизматни кўрсатдик”, — дейди шифокор Барат Бободўстов.
Шифокорнинг сўзларига кўра, болага ёпиқ қўшма жароҳат, ёпиқ бош мия шикастланиши, бош миянинг лат ейиши, қон қуйилиши, мия шишиши ва мия комаси, ўткир нафас етишмовчилигининг иккинчи даражаси билан ташхис қўйилган.
Боланинг тоғаси, аёлнинг укаси Ж.Ж. ҳолат юзасидан Ички ишлар ходимларига мурожаат қилганини, аммо улар шикоятни тингламаётганини айтган. Унинг айтишича,
“Опам бизнинг Бойқўрғон маҳалласидан Теракли маҳалласига турмушга чиққан. 2 нафар боласи бор. 1 ва 2 ёшли. Катта ўғли Ҳ.ни отаси уриб, оғир тан жароҳати етказди. Шифокорлар ‘oперация қилсак, омон қолмаслиги мумкинʼ, деб айтмоқда. Воқеадан аввал опамни 3 кун қийнаб, уйида олиб ўтирган.
“Агар ички ишларга ёки уйдагиларга хабар берсанг, иккинчи болангдан ҳам айриласан, деб айтган. Ички ишлар бошқармаси ходимларига чиқдик. Улар бир марта келиб, кейин воқеа билан умуман қизиқмай қўйишди”.
Мазкур ҳолат юзасидан Деҳқонобод туман ИИБ ҳузуридаги Тергов бўлинмаси томонидан терговга қадар текширув ҳаракатлари олиб борилмоқда.
Аввалроқ, Сурҳондарёда боласидан воз кечган она қамалгани, олти ёшли боласини сотмоқчи бўлган аёл беш йилга қамалгани тўғрисида хабар қилинганди.
Чўлпоной Аҳмедова
