Чинозда «Жиҳодчилар»нинг 10 нафари ушланди
Тошкент вилоятининг Чиноз туманида «Жиҳодчилар» экстремистик оқими аъзоларининг 10 нафари қўлга олинди, деб хабар бермоқда Тошкент вилояти ИИББ матбуот хизмати.
Маълум қилинишича, ҳозирда ушбу тадбир ИИББ ва ҳамкор ташкилотлар билан биргаликда вилоятнинг барча шаҳар, туманлари кесимида давом эттириляпти.
Жумладан, ДХХ Тошкент вилояти бошқармаси ҳамда вилоят ИИББ томонидан Чиноз туманида ўтказилган тезкор тадбирда яширин фаолият олиб бораётган «Жиҳодчилар» оқими аъзоларининг 10 нафари қўлга олинган.
Суриштирув давомида ушбу шахслар «жиҳод» мақсадида Сурия давлатига чиқишни режалаштиргани аниқланган. Ҳозирда ҳолат юзасидан тергов ҳаракатлари давом эттирилмоқда.
Эслатиб ўтамиз, аввалроқ Қўқонда “жиҳодчилар” оқими тарафдорлари фаолиятига чек қўйилгани ҳамда Сирдарё ва Сурхондарёда террорчилик ташкилоти аъзолари ушлангани ҳақида хабар берилганди.
