Жамият
|
24 Сентябр 10:30
296
Жамият
|
24.09.2021, 10:30
296

Қорақалпоғистонда 29 нафар абитуриентни 83 минг АҚШ доллари эвазига ўқишга киритиб қўйишни ваъда қилган шахс ушланди

Бош прокуратура ҳузуридаги Департамент ҳамда Давлат хавфсизлик хизматининг Қорақалпоғистон Республикаси бошқармалари томонидан фуқароларнинг ҳуқуқ ва манфаатларини ҳимоя қилиш юзасидан тезкор тадбир ўтказилди.

 

Қорақалпоғистонда 29 нафар абитуриентни 83 минг АҚШ доллари эвазига ўқишга киритиб қўйишни ваъда қилган шахс ушланди

 

Иқтисодий жиноятларга қарши курашиш департаменти хабарига кўра, тадбирда фуқаро Р.Э. бошқа бир фуқаро Ш.га ўзини Давлат тест марказида ишловчи шахс сифатида таништириб, унга “Али” исмли таниши орқали ўқишга кира олмаган абитуриентларнинг балларини кириш балларига тенглаштириб, жами 29 нафар абитуриентни ўқишга киритиб қўйиш эвазига 83 000 АҚШ долларини фирибгарлик йўли билан олган вақтида ашёвий далиллар билан ушланган.

 

Таъкидланишича, мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилган. Ҳозирда тергов ҳаракатлари ўтказилмоқда.

 

Аввалроқ Сурхондарёда талабаларни 5,4 млн сўмга чув тушириб кетган шахс ҳамда Андижон ва Хоразм вилоятларида абитуриентларни ўқишга киритиб қўйишни ваъда қилган институт ҳисобчиси ва талаба қўлга олинганди. Шунингдек, Бухорода тиббиёт коллежига 400 доллар эвазига ўқишга киритишни ваъда қилган шахс ушлангани тўғрисида хабар берилганди.