Жума куни кечқурун Россия ҳарбий дронлари Украинадаги иккинчи йирик шаҳар – Харковдаги тиббиёт муассасаси ва бошқа объектларга зарба берди. Маҳаллий ҳокимият вакилларининг маълум қилишича, камида беш киши жароҳатланган.
Харков вилояти губернатори Олег Синегубов Телеграм орқали берган баёнотида саккизта дрон шаҳар марказидаги учта туман бўйлаб фуқаролик объектларига ҳужум уюштирганини айтди. Унга кўра, беш киши жароҳатланган, бироқ шаҳар мери Игор Тереҳов бу рақамни етти деб кўрсатди.
Ҳужум оқибатида 50 дан ортиқ бемор шифохонадан эвакуация қилинди, ёнғинлар юзага келди. Ўнлаб бинолар зарар кўрди, кўп қаватли уйларда, автомобиль салонида ва йирик гипермаркетда деразалар синиб кетди.
Бундан ташқари, Қора денгиз бўйида жойлашган Одесса шаҳрида ҳам дрон ҳужумлари содир бўлди. Оқибатда хусусий уй ва ишлаб чиқариш корхонаси ёнғин ичида қолди, бир киши ҳалок бўлди, яна бири жароҳат олди.