БМТ бош котиби Киевда бўлиб турган бир пайтда шаҳарга ракета зарбалари берилди. Бу ҳақда “BBC” хабар берди.
Владимир Зеленскийнинг сўзларига кўра, жами бешта ракета ташланган. Улар шаҳарнинг марказий Шевченко туманида портлаган. Ракеталардан бири Антониу Гутерриш турган меҳмонхона яқинига тушган.
Зарбалар Гутерриш ва Зеленскийнинг қўшма матбуот анжумани тугаганидан бир соат ўтиб берилган. БМТ бош котиби унда Хавфсизлик кенгаши фаолиятини танқид қилганди.
Гутерриш ва унинг ҳамроҳлари ҳеч қандай жароҳат олмаган. Бош котиб матбуот котибининг сўзларига кўра, ракета тушган пайтда Гутерриш Украина бош вазири офисида бўлган.
Унинг ўзи “BBC”га шокка тушганини айтган.
“Ушбу урушни тўхтатиш зарур ва бунинг ечимини топишимиз керак”, – деган у.
Украина ТИВ раҳбари Дмитрий Кулеба Киевда БМТ бош котиби ва Болгария бош вазири бўлиб турган бир пайтда ракета зарбалари берилишини даҳшатли ва варварлик ҳаракати сифатида баҳолаган.
Аввалроқ Путин БМТ бош котиби билан учрашгани тўғрисида хабар берилганди.