Россия Украинага йирик дронлар ҳужуми уюштирди
Оқибатда 2 та омборхона ва 4 та хусусий уй зарар кўрган.
17 февралга ўтар кечаси ва эрталаб Россия қўшинлари Украина бўйлаб 147 та дрон учирди, уларнинг 80 дан ортиғи уриб туширилди. Бу ҳақида Украина Ҳарбий-ҳаво кучлари қўмондонлиги хабар берди.
Украина Фавқулодда вазиятлар давлат хизмати Киев вилоятининг тўрт туманига ҳам дронлар ҳужум қилинганини маълум қилди. Киев вилоятида дрон ҳужуми натижасида иккита омборхона, тўртта хусусий уй ва иккита автомобил зарар кўрган. Бундан ташқари, 2003 йилда туғилган маҳаллий фуқаро тан жароҳати олган.
“Укренерго” компанияси Россия ҳужумининг нишони энергетика объектлари бўлганини ва бутун мамлакат бўйлаб фавқулодда электр таъминотида узилишлар киритилганини маълум қилди.
