Қарздор ота алимент тўлови ўрнига фарзандларига уй берди

Фуқаролик ишлари бўйича Қумқўрғон туманлараро судининг 2018 йил 17 июлдаги ижро ҳужжатига асосан Р.Холтўраевдан уч нафар фарзандининг моддий таъминоти учун собиқ турмуш ўртоғи Н.Чориева фойдасига алимент ундириш белгиланган.

Мажбурий ижро бюроси Қумқўрғон туман бўлими ходимлари олиб борган ижро ҳаракатлари чоғида қарздор отани яшаш манзилидан топишнинг имкони бўлмади. Алиментчи отада йирик миқдордаги қарздорлик юзага келгани учун унга нисбатан 2020 йил ноябрь ойида қидирув эълон қилиниб, Р.Холтўраев қидириб топилгунгача ижро ҳаракатлари вақтинча тўхтатилди.

МИБнинг Сурхондарё вилоят бошқармаси томонидан олиб борилган қидирув натижаларига кўра, қарздор ота Тошкент шаҳридан топилиб, ижро ҳаракатларини давом эттириш учун Қумқўрғон туман бўлимига топширилди.

Давлат ижрочилари Р.Холтўраевга алимент тўлашдан бош тортганлик учун амалдаги қонунларимизда маъмурий ва жиноий жавобгарлик белгилаб қўйилганини тушунтирди. Бундан тўғри хулоса чиқарган алиментчи ота собиқ турмуш ўртоғи билан ўзаро келишиб, уч фарзандининг моддий таъминоти учун алимент пули ўрнига ўзига тегишли Қумқўрғон тумани Тўғон маҳалласидаги уй-жойни нотариал тартибда расмийлаштириб берди.

Бюронинг туман бўлими мазкур ижро ҳужжатини белгиланган тартибда муддатидан олдин тугатиб, қарздорга қўллаган барча чекловларни бекор қилди.

          Эслатиб ўтамиз, аввалроқ алимент тўламаган 11 нафар ота қамоққа олингани ҳамда Самарқандда қарздор ота фарзандларига 260 миллион сўм алимент тўлагани ҳақида хабар берилганди.