Самарқандда 2 нафар шахс поезд вагонидан 755 кг кўмирни талон-торож қилди
Кўмир маҳсулотлари ортилган юк поезди қарама-қарши йўналишда келаётган юк поездини ўтказиб юбориш учун тўхтаган.
ИИВ Транспорт ва туризм объектларида хавфсизликни таъминлаш департаменти хабарига кўра, Зирабулоқ—Зиёвуддин темир йўл бекатлари оралиғида тўхтаган юк поездидан кўмирларни талон-торож қилишга уринган шахслар қўлга олинди.
Маълум бўлишича, жорий йилнинг 11 ноябрь куни Самарқанд вилоят ИИБ Транспортда ХТБга Зирабулоқ—Зиёвуддин темир йўл бекатлари оралиғида юк поезди тўхтагани бўйича хабар келиб тушган.
Ҳолат юзасидан олиб борилган суриштирув ишлари натижасида 10 ноябрь куни соат 21:21 да ушбу темир йўл бекатлари оралиғида Мароқанд—Тинчлик йўналишида ҳаракатланаётган вагонларда орасида кўмир маҳсулотлари ортилган юк поезди 3810-километрида қарама-қарши йўналишда келаётган юк поездини ўтказиб юбориш учун тўхтаган.
Поезд тўхтаган вақтда Самарқанд вилояти Нарпай туман "Дўстлик" маҳалласида яшовчи фуқаролар Э.М. (1980 йилда туғилган) ва М.З. (1982 йилда туғилган) ярим очиқ вагондан 755 килограмм кўмир маҳсулотларини талон-торож қилган вақтида ашёвий далил билан ушланган.
Ҳозирда мазкур ҳолат юзасидан терговга қадар текширув ҳаракатлари олиб борилмоқда.
Эслатиб ўтамиз, аввалроқ Термиз шаҳрида кўмир маҳсулоти талон-торож қилингани, Фарғонада омбор мудири аҳоли ва давлат ташкилотларига тарқатилиши керак бўлган 852 минг тонна кўмирни сотиб юборгани ҳамда Термизда кўмир ўғриларига жиноий иш қўзғатилгани ҳақида хабар берилганди.
