Сўнгги 30 йилдаги илк ташриф: БМТ миссияси Тоғли Қорабоғга келди
Бундан кўзланган асосий мақсад — зарур инсонпарварлик ёрдами ҳажмини баҳолашдир.
Озарбойжоннинг минтақадаги ҳарбий амалиётидан сўнг арман аҳолиси томонидан деярли бутунлай ташлаб кетилган Тоғли Қорабоғга БМТ миссияси 30 йил ичида биринчи марта етиб келди. Унинг келиши ҳақида 1 октябрь куни Боку расмийлари хабар берди.
Қайд этилишича, БМТ миссиясининг асосий мақсади зарур инсонпарварлик ёрдами ҳажмини баҳолашдан иборат. Ўз навбатида, Тоғли Қорабоғдан ўн минглаб қочқинларни қабул қилган Арманистонда 1 октябр куни Арцах (Тоғли Қорабоғ) учун миллий ибодат куни бўлиб ўтди. Бутун мамлакат бўйлаб ибодатхоналарда қўнғироқлар чалинди. Барча арманларнинг олий патриархи Гарегин II ўз қароргоҳи жойлашган Эчмиадзин шаҳрида маросим ўтказди.
Эслатиб ўатмиз, Ереван Озарбайжонни Тоғли Қорабоғ ҳудудидаги ҳаракатларда айблади. 29 сентябрь куни Арманистон Озарбайжонга қарши БМТ Халқаро судига даъво аризаси билан мурожаат қилиб, ирқий камситишнинг барча шаклларига барҳам бериш тўғрисидаги халқаро конвенцияга риоя этишни талаб қилди.
Бундан ташқари, Ереван Бокуни БМТ ва Қизил Хоч ходимларининг минтақадаги арман аҳолиси билан мулоқотни таъминлашга, тан олинмаган Тоғли Қорабоғ Республикаси расмийлари томонидан берилган фуқаролик ҳолати далолатномалари гувоҳномаларини ҳақиқий деб тан олишга ва арман маданий меросининг ёдгорликларини бузишни тақиқлашга чақирди.
Боку Тоғли Қорабоғдаги этник арманлар ҳақидаги айбловларни рад этиб, уларнинг ҳуқуқлари ҳурмат қилинишини билдирди.
