Сурхондарёда 32 ёшли эркак 10 ёшли қизга шилқимлик қилди
Ҳолат юзасидан Болалар омбудсмани муносабат билдирди.
Жорий йилнинг 3 июнь куни 1992 йилда туғилган Б.Ш. қўшниси Ш.M.нинг 2014 йилда туғилган қизи Д.A.гa уйида ҳеч ким йўқлигидан фойдаланиб, уятсиз қилиқлар қилиб, унинг жинсий дахлсизлигига таҳдид қилган.
Б.Ш. вояга етмаган қизга агар бўлган ҳолатни кимгадир айтадиган бўлса, уни ўлдириш билан қўрқитган. Қизнинг онаси эркакнинг ҳаракатларини қизи видеотасвирга тушириб олганини, бу ҳолат юзасидан тергов органларига хабар берганини, лекин улар томонидан тегишли чора кўрилмаётганлигини билдириб, фарзандининг ҳуқуқларини ҳимоя қилишда ёрдам сўраган.
Болалар омбудсманининг Ички ишлар вазирлигига юборган сўрови асосида Сурхондарё вилояти ИИБ ҳузуридаги Тергов бошқармаси томонидан мазкур ҳолат юзасидан жорий йилнинг 7 июль куни Б.Ш.гa нисбатан ЖКнинг 129-моддаси 2-қисми “v” банди (Ўн олти ёшга тўлмаган шахсга нисбатан уятсиз-бузуқ ҳаракатлар қилиш) билан жиноят иши қўзғатилган.
Жиноят иши юзасидан 26 июль куни айбланувчи Б.Ш.га нисбатан “қамоқ”» эҳтиёт чораси қўлланилди. Ҳозирда дастлабки тергов ҳаракатлари тамомланиб, жиноят иши материаллари тегишли судга юборилган.
