Сурхондарёда Мирзо Улуғбек ҳукмронлиги даврига оид “хазина” топилди
9 мартдан бошлаб Сариосиё туманида илмий изланиш олиб борилади.
Маданий мерос агентлигининг хабар қилишича, Сариосиё туманидаги Алишер Навоий маҳалласида яшовчи фуқаролар Тўпаланг дарёси қирғоғидан жуда кўп миқдорда мис тангалар топиб олгани ҳақида маълумотлар тарқалган.
Ишчи гуруҳнинг туманда олиб борган ўрганишлари натижасида бу маълумот тасдиқланган. Олимларнинг таъкидлашича, мазкур ашёлар ҳозиргача ватанимиз ҳудудидан топилган Мирзо Улуғбек ҳукмронлиги даврида зарб эттирилган пул тангаларининг энг катта ва яхши сақланган хазинаси ҳисобланади.
Шунингдек, Сариосиё туманидаги Алишер Навоий маҳалласида яшовчи фуқаролар томонидан топилмалар талон-тарож қилинаётганлиги аниқланган.
Айни пайтда топилмалар аниқланган ҳудуд муҳофазага олинган. 9 мартдан бошлаб Сариосиё тумани Тўпаланг дарёси ҳудудида илмий изланишлар олиб борилади.
