Таиланднинг шарқий қисмида, Бангкокдан 120 км узоқликда жойлашган Прачинбури вилоятида даҳшатли йўл-транспорт ҳодисаси содир бўлди. Маҳаллий Thairath нашрининг хабар беришича, экскурция автобуси иштирокидаги ҳалокатда камида 18 киши ҳалок бўлган, яна 20 га яқин одам жароҳатланган.
Фожиа 200 кишилик сайёҳлар гуруҳини олиб кетаётган учта автобусдан бири бошқарувни йўқотиши натижасида юзага келган. У бетон тўсиққа урилиб, ағдарилган. Ушбу автобусда 47 йўловчи ва 2 ҳайдовчи бўлган.
Маълум қилинишича, транспорт воситаси Бунгкан вилоятидан курорт шаҳри Районгга йўл олган эди. Маҳаллий расмийлар жароҳатланганларнинг шифохонага етказилганини тасдиқлади. Қутқарувчилар бедарак йўқолганларни излаш ишларини давом эттирмоқда. Ҳодиса юзасидан полиция тергов бошлаган.